Real Madrid ka marrë një fitore të pastër 3-0 ndaj Racing Santander në “El Sardinero”, duke vazhduar rikthimin në formë dhe duke ngushtuar diferencën me Barcelonën dhe Atlético Madrid.
Skuadra e José Mourinhos dominoi që në fillim dhe kaloi në avantazh pas një penalltie të diskutueshme. Mbappé u rrëzua në zonë pas një kontakti me Pratin, ndërsa arbitri akordoi 11-metërsh dhe VAR-i nuk ndërhyri. Francezi realizoi për 1-0.
Pavarësisht polemikës, Real Madrid kontrolloi ndeshjen dhe krijoi vazhdimisht raste. Arda Güler dhe Jude Bellingham ishin dy nga protagonistët kryesorë.
Goli i dytë erdhi pikërisht nga bashkëpunimi mes tyre. Güler gjeti Bellingham me një pasim të saktë, ndërsa anglezi kaloi mbrojtjen, shmangu portierin Agirrezabala dhe shënoi në portën e boshatisur.
Para pushimit, Real Madrid realizoi edhe golin e tretë. Diomande goditi fuqishëm me të djathtën nga jashtë zonës dhe vulosi rezultatin 3-0.
Në pjesën e dytë madrilenët ulën ritmin dhe Mourinho shfrytëzoi mundësinë për të bërë rotacione, duke aktivizuar Brahim, Endrick dhe Camavinga.
Racing pati një mundësi për t’u rikthyer në lojë kur arbitri akordoi penallti pas një prekjeje të topit me parakrahun e Tchouaménit, por pas ndërhyrjes së VAR-it vendimi u anulua.
Real Madrid siguroi kështu një tjetër fitore bindëse dhe vazhdon të afrohet me kreun, ndërsa vëmendja tani kalon te përballja mes Barcelonës dhe Atlético Madrid.
