Hansi Flick ka festuar reagimin e Barcelonës pas fitores së thellë 6-1 ndaj Alavés, por trajneri gjerman mbetet i shqetësuar për problemet e shumta në mbrojtje përpara sfidave ndaj Aston Villa dhe Atlético Madrid.
Pas dy humbjeve radhazi ndaj PSG-së dhe Real Madridit, Barça u rikthye me një paraqitje bindëse në “Spotify Camp Nou”.
“Luajtëm me shumë lojtarë të ndryshëm. Kontrolluam kundërshtarin dhe ishim shumë të përqendruar në mbrojtje. Jam i lumtur për këtë reagim”, deklaroi Flick.
Për shkak të mungesave të Xavi Espart, Jules Koundé, Andreas Christensen dhe Eric García, trajneri u detyrua të improvizonte. Frenkie de Jong u aktivizua si qendërmbrojtës, ndërsa Brian Fariñas luajti në të djathtë të mbrojtjes.
“E pyeta Frenkie nëse mund të luante në atë pozicion dhe ai ndihmoi skuadrën. E falënderoj për këtë. Edhe Brian bëri shumë mirë, edhe pse nuk kishte luajtur më parë si mbrojtës krahu.”
Megjithatë, Flick pranoi se situata mbetet e komplikuar:
“Duhet të mbijetojmë në dy ndeshjet e ardhshme. Shpresoj që një ose dy lojtarë të rikthehen, por nuk duam të marrim asnjë rrezik.”
Trajneri vlerësoi gjithashtu Raphinhan dhe Lamine Yamal, të cilët realizuan nga dy gola.
“Kjo ishte pikërisht ajo që doja të shihja pas dy humbjeve.”
Flick vendosi ta zëvendësonte Yamal në pjesën e dytë për t’i dhënë pushim përpara kalendarit të ngjeshur.
Fitorja ndaj Alavés ishte gjithashtu e 100-ta e Flick si trajner i Barcelonës. I pyetur për triumfin më të bukur, ai veçoi fitoren 4-0 ndaj Real Madridit në Bernabéu gjatë sezonit të tij të parë.
