Një situatë alarmante po shfaqet në Bosnje, ku një gjeneratë e re nacionalistësh etnikë serbë po përgatitet për mundësi të reja konflikti të armatosur, sipas një investigimi të The Telegraph. Gazeta britanike tregon se qindra militantë serbë kanë udhëtuar në Ukrainë për të luftuar përkrah forcave ruse, duke besuar se Rusia do t’i ndihmojë të rikthejnë territore të humbura si Kosovën. Këta individë, përfshirë veteranë të luftës së Bosnjës, po përdorin rrjetet sociale për të rekrutuar të rinj serbë me premtime financiare të larta, deri në 23 mijë paund.
Kthimi i këtyre luftëtarëve në Bosnje ngjall shqetësime për ringjalljen e tensioneve etnike dhe konflikteve paramilitare në një rajon ende të brishtë. Një rast i tillë është ai i Dario Ristic, një nacionalist serb që u plagos rëndë në Ukrainë dhe tani është në arrest shtëpie në Bosnje, pas një arrestimi për pjesëmarrje në një formacion paramilitar të huaj. Ai aktualisht ka një ndikim të madh në rrjetet sociale, duke sjellë një rrezik të madh për rekrutime të reja.
The Telegraph gjithashtu nënvizon se një grup veteranësh të luftës, përfshirë figura të njohura si Davor Savicic, i njohur si “Ujku”, po luajnë një rol kyç në këto lëvizje. Savicic, i lidhur me njësi famëkeqe paramilitare, dyshohet se po krijon kompanitë guackë për të ndihmuar rekrutët të shmangin ndjekjen nga autoritetet. Situata është veçanërisht shqetësuese në rajone me papunësi të lartë, ku propaganda nacionaliste dhe ofertat financiare gjejnë terren të favorshëm.
Raporti gjithashtu ngrit dyshime për mundësinë e bashkëpunimit shtetëror me liderë si Milorad Dodik, që kanë lidhje me Rusia. Kjo infrastrukturë paramilitare mund të ketë pasoja për sigurinë evropiane, duke ndikuar në situata jashtë kontrollit. Komuniteti mysliman boshnjak është veçanërisht i shqetësuar nga kthimi i këtyre luftëtarëve, duke rihapë plagë të vjetra dhe duke e bërë përpjekjen për pajtim të vështirë. Një dëshmitar i luftës shprehet se ata “refuzojnë të jetojnë sërish në frikë”, duke ilustruar tensionet aktuale.
