Kryeministri kanadez Mark Carney po shqyrton mundësinë që Kanadaja të bëhet “anëtare e asociuar” e Bashkimit Evropian, në një lëvizje që do të afronte ndjeshëm vendin me Evropën, raporton Wall Street Journal.
Ideja vjen në një moment kur marrëdhëniet tregtare mes Kanadasë dhe Shteteve të Bashkuara janë përkeqësuar ndjeshëm për shkak të tarifave dhe mosmarrëveshjeve tregtare të administratës së Donald Trump. Ottawa po kërkon alternativa për të ulur varësinë ekonomike nga tregu amerikan.
Sipas raportimit, statusi i propozuar do të ishte diçka mes një marrëdhënieje të ngushtë partneriteti dhe anëtarësimit të plotë në BE. Kanadaja do të synonte lehtësimin e lëvizjes së mallrave, shërbimeve dhe punonjësve, veçanërisht në sektorë strategjikë si energjia, inteligjenca artificiale dhe mbrojtja.
Ottawa dhe Brukseli po shqyrtojnë gjithashtu projekte të përbashkëta në infrastrukturë, përfshirë kabllot nënujore, rrjetet satelitore dhe infrastrukturën energjetike. Carney ka zhvilluar bisedime të shpeshta me liderë evropianë, mes tyre presidentin francez Emmanuel Macron.
Megjithatë, një “anëtarësi e asociuar” nuk ekziston aktualisht si kategori zyrtare e BE-së dhe do të duhej të krijohej një kuadër i ri. Për më tepër, marrëveshja tregtare Kanada-BE, CETA, ende nuk është ratifikuar plotësisht nga të gjitha vendet anëtare.
Carney pritet të udhëtojë në Strasburg më 15 shtator dhe të flasë në Parlamentin Evropian, ndërsa Kanadaja dhe BE-ja po përgatiten edhe për një samit në tetor.
