Tingëllon e çuditshme, por kryeministri Edi Rama ka deklaruar sot se Shqipërisë do t’i shtohen 4 universitete të reja.
Gjatë fjalës së tij në Podcast-in ‘Flasim’, kryeministri njoftoi se bëhet fjalë për 4 universitete, një në Fier, një në Vlorë, një në Korçë dhe i fundit në Tiranë.
Ai tha: “Një është Universiteti i Fierit, i cili do të jetë një universitet ekselence për mjekësi, ai i Vlorës, i cili do të jetë i përgjithshëm dhe më i madh. Një tjetër në Korçë për teknologjinë dhe AI dhe tjetri në Tiranë, po ashtu i përgjithshëm.”
Ajo që e bën këtë lajm të tingëllojë i çuditshëm janë statistikat kokëforta. Gjatë viteve të fundit, çdo fillim viti akademik, rektorë dhe përfaqësues të universiteteve kanë dalë në deklarata publike dhe kronika lajmesh, duke deklaruar se degë të caktuara po mbyllen për shkak të mungesës së interesit nga ana e studentëve.
Për të sjellë disa shembuj, mjafton të kujtojmë se në tetor 2019 u raportua se në Universitetin e Korçës rezultonin 2 degë pa studentë, në Vlorë 3 degë të mbyllura, ndërsa në Elbasan 6 degë të mbyllura.
Një vit më vonë, në nëntor 2020 u raportua se për shkak të mungesës së studentëve, në Universitetin e Gjirokastrës nuk u aktivizuan për vitin 2020–2021 Teknologji Informacioni, Matematikë-Fizikë dhe Gjuhë Italiane, ndërsa në Universitetin e Elbasanit u mbyllën 3 degë për mungesë studentësh.
Sipas statistikave të regjistrimeve për vitin akademik 2024-2025, bie në sy se 41.3% e degëve në 10 universitetet kryesore publike ishin në rrezik mbylljeje për shkak të mungesës së studentëve; në Universitetin e Gjirokastrës shifra raportohet 81.8%.
Përballë këtyre statistikave zhgënjyese, lajmi për hapjen e 4 universiteteve të reja tingëllon paradoksal. Në këtë situatë ngrihen disa pikëpyetje: A do të studiojnë në këto universitete studentë vendas, apo do të shërbejnë për studentë të huaj?
Kjo mbetet për t’u parë.
