Vedat Muriqi ka zhvilluar sezonin më të mirë të karrierës së tij, por paraqitjet e shkëlqyera individuale nuk kanë mjaftuar për të shpëtuar Mallorcën nga rënia prej La Liga.
Sulmuesi nga Prizreni ka shënuar më shumë se kurrë më parë dhe ka regjistruar sezonin me më shumë minuta në karrierë. Megjithatë, ky vit i madh në aspektin personal u mbyll me dy zhgënjime të rënda: Mallorca nuk arriti të qëndronte në elitën e futbollit spanjoll, ndërsa Kosova nuk siguroi kualifikimin në Kupën e Botës.
Muriqi u bë pjesë e një liste shumë të rrallë në historinë e La Liga, atë të sulmuesve që kanë shënuar mbi 20 gola në një sezon, por nuk kanë arritur ta shpëtojnë skuadrën nga rënia. Para tij, raste të ngjashme ishin Quini me Sporting, Morena me Rayo dhe Jimmy Floyd Hasselbaink me Atlético Madrid.
Shqiptari i Kosovës e mbylli sezonin me 22 gola nga 43 gjithsej të shënuar nga Mallorca, duke mbajtur mbi supe më shumë se gjysmën e golave të skuadrës. Me 51.16% të golave të ekipit, ai kishte peshën më të madhe sulmuese në pesë ligat kryesore të Evropës, duke lënë pas emra si Igor Thiago, Ante Budimir, Haaland dhe Mbappé.
Edhe në aspektin e efikasitetit, Muriqi ka qenë ndër më të dalluarit në La Liga. Ai është lojtari që ka gjetur më shpesh rrjetën me goditjen e parë në ndeshje, duke shënuar dhjetë gola në këtë mënyrë gjatë sezonit.
Por gëzimi individual është zbehur nga zhgënjimet kolektive. Me Kosovën, Muriqi iu afrua shumë ëndrrës së Kupës së Botës, por përfaqësuesja u ndal në play-off pas humbjes minimale ndaj Turqisë. “Kemi kaluar shumë, por e gjithë skuadra po vuan”, ishte deklarata e tij atë mbrëmje në Prishtinë.
Tani e ardhmja e sulmuesit mbetet e hapur. Muriqi ka kontratë me Mallorcën deri në vitin 2029 dhe më parë ka deklaruar se është i qetë për situatën e tij, por rënia nga La Liga mund të ndryshojë gjithçka.
Klube nga Turqia vazhdojnë ta ndjekin me interes. Fenerbahce e ka kërkuar më parë, ndërsa së fundmi edhe Galatasaray ka shfaqur interes për ta afruar si zëvendësues të Mauro Icardi. Për momentin, gjithçka mbetet në dorë të klubit dhe të vetë lojtarit.
