Një nga gjeneratat më të mëdha në historinë e futbollit spanjoll po përgatitet të mbyllë përfundimisht kapitullin e saj si futbollistë profesionistë.
Raúl Albiol, Pedro Rodríguez, Sergio Ramos dhe Juan Mata janë katër lojtarët e fundit ende aktivë nga skuadra e Spanjës që fitoi Kupën e Botës në vitin 2010. Të katërt tashmë janë shumë pranë tërheqjes, ndërsa njoftimet zyrtare priten në ditët e ardhshme.
Albiol, 41 vjeç, kishte dëshirë të vazhdonte edhe një sezon pas eksperiencës së fundit në Itali, por mungesa e ofertave bindëse po e shtyn drejt një roli tjetër në futboll. Pedro, 39 vjeç, vazhdoi të luante dhe të shënonte me Lazion deri në fund të sezonit të kaluar, por gjithashtu pritet të njoftojë tërheqjen.
Sergio Ramos, tashmë 40 vjeç, nuk ka luajtur që prej largimit nga Monterrey në dhjetor dhe po mendon gjithnjë e më shumë për një të ardhme në stol, duke synuar të pajiset me kualifikimet e nevojshme si trajner.
Edhe Juan Mata, 38 vjeç, duket pranë fundit të karrierës. Ish-mesfushori spanjoll ka marrë oferta pas eksperiencës me Melbourne City, por gjithçka tregon se tërheqja e tij është gjithashtu shumë pranë.
Ndërkohë, shumë prej shokëve të tyre nga ajo Spanjë historike kanë kaluar tashmë në një kapitull tjetër. Xavi Hernández, Xabi Alonso, Cesc Fàbregas, Álvaro Arbeloa dhe Fernando Torres kanë zgjedhur trajningun, ndërsa edhe Andrés Iniesta ka nisur rrugën e tij drejt pankinës.
Me tërheqjen e Albiol, Pedro, Ramos dhe Mata do të mbyllet përfundimisht në fushë epoka e brezit që i dhuroi Spanjës Kupën e Botës 2010.
