Gjykata Supreme e Spanjës ka konfirmuar vendimin e mëparshëm të Gjykatës Provinciale të Barcelonës, duke liruar Neymar da Silva Santos Júnior dhe ish-drejtuesit e Barcelonës, Sandro Rosell dhe Josep Maria Bartomeu, nga akuzat për korrupsion në biznes dhe mashtrim në çështjen e transferimit të brazilianit te Barça në vitin 2013.
Vendimi i fundit rrëzon ankimimet e paraqitura kundër aktgjykimit të parë dhe mban në fuqi pafajësinë e të akuzuarve. Sipas gjykatës, kompania DIS kishte fituar në vitin 2009 të drejtat ekonomike që rridhnin nga të drejtat federative të Neymarit, kur ai ishte ende lojtar i Santosit, duke paguar për to pesë milionë realë brazilianë.
Më pas, Barcelona arriti një marrëveshje me lojtarin që ai të firmoste me klubin katalanas kur të mbetej i lirë në vitin 2014. DIS pretendonte se kjo marrëveshje ishte mashtruese, pasi transferimi u përshpejtua dhe u realizua që në vitin 2013, duke argumentuar se ajo duhej të përfitonte më shumë kompensim për shkak të të drejtave ekonomike që zotëronte.
Megjithatë, Gjykata Supreme vlerësoi se DIS zotëronte vetëm 40% të të drejtave ekonomike dhe jo të drejtat federative, të cilat janë ato që i japin mundësi një lojtari të nënshkruajë me një klub tjetër ndërsa është ende nën kontratë me ekipin aktual. Për këtë arsye, DIS kishte marrë 6.84 milionë euro, që përfaqësonin 40% të shumës së transferimit prej 17.1 milionë eurosh.
Gjykata theksoi se nuk ka prova që kontratat e mëparshme janë përdorur për të fshehur një qëllim mashtrues ndaj DIS. Sipas saj, marrëveshja mes Barcelonës dhe Neymarit ishte reale dhe kishte të bënte me dakordësimin e kushteve ekonomike për momentin kur lojtari do të mbetej i lirë, çështje kjo që bie në fushën e së drejtës sportive dhe rregulloreve të FIFA-s dhe UEFA-s, jo në atë penale.
Po ashtu, gjykata e konsideroi të parëndësishme nëse Santosi kishte dijeni apo jo për marrëveshjen e nëntorit 2011, duke theksuar se në fund u realizua një transferim dhe secila palë mori atë që parashikohej ligjërisht në kontratë.
