Barcelona pritet të paguajë një gjobë prej 602 eurosh pasi Federata Mbretërore Spanjolle e Futbollit të marrë vendimin për çështjen e ngritur pas ankesës së Atlético Madrid.
Klubi madrilen akuzoi Barcelonën se kishte kontaktuar me Julián Álvarez, pavarësisht se sulmuesi ka kontratë me Atlético Madrid deri më 30 qershor 2030.
Atlético kishte paraqitur ankesë si në Federatën Spanjolle, ashtu edhe në FIFA. Megjithatë, organi më i lartë i futbollit botëror e shpalli veten jo kompetent për trajtimin e çështjes.
Sanksioni ndaj Barcelonës bazohet në nenin 133 të rregullores federative, që lidhet me shkelje të lehta të detyrimeve të përcaktuara nga rregulloret.
Sipas qëndrimit të Atlético Madrid, Barcelona duhej të kishte kontaktuar fillimisht me klubin që zotëron të drejtat e futbollistit dhe ta kishte bërë këtë zyrtarisht me shkrim përpara çdo kontakti me lojtarin.
Gjobë prej vetëm 602 eurosh konsiderohet një ndëshkim pothuajse simbolik për klubin katalanas, pas një vere me tension të lartë mes dy klubeve lidhur me të ardhmen e Julián Álvarez.
Situata ishte përshkallëzuar pasi sulmuesi, gjatë Kupës së Botës në Shtetet e Bashkuara, kishte kërkuar një transferim duke deklaruar se kjo do të ishte “zgjidhja më e mirë për të gjitha palët”.
