Kryeministri Edi Rama në Forumin Ekonomik të Delfit zhvilloi një bisedë me Alexis Papahelas, kryeredaktor i gazetës Kathimerini. I pyetur nga ai nëse Ballkani është një “lagje e harruar”, Rama u shpreh se nuk është i harruar.
Gjatë përgjigjes së tij, kreu i qeverisë foli edhe për anëtarësimin e Shqipërisë në BE, duke u shprehur se më parë BE nuk ka qenë e vetëdijshme për reformat e Shqipërisë, ndërsa tani, sipas tij, Shqipëria ka më shumë vizibilitet dhe është më e njohur në shumë mënyra.
“Jemi anëtar të NATO-s, por nuk është se vendosim shumëçka atje. Kur NATO bën diçka të mirë, ne themi se kemi bërë diçka të shkëlqyer, kur bën diçka të keqe, ne themi është faji i tyre. Sepse të mëdhenjtë marrin fajin, të vegjlit mund të marrin edhe ndonjë meritë. Jo, nuk mendoj se Ballkani Perëndimor është i harruar. Kam ndjesinë që jemi në kohën më të mirë për të qenë të qartë se Ballkani Perëndimor është në një moment të rëndësishëm. BE nuk ka qenë kurrë kaq e vetëdijshme për rëndësinë e rajonit tonë në gjeopolitikë, kemi më shumë vizibilitet se më parë. Gjatë dekadës së fundit është bërë normalizimi i dialogut dhe bashkëpunimit, por kurrë nuk kemi qenë kaq të përfshirë dhe të ulur së bashku në tryeza të përbashkëta. Në vitin 2021 në Berlin, 6 udhëheqësit e Ballkanit Perëndimor u ulën për herë të parë në të njëjtën tryezë, kështu që nuk jemi të harruar, jemi në një kohë më të mirë se më parë”, u shpreh Rama.
