Një person ka mbetur i plagosur me armë zjarri pranë një resorti në Shëngjin paraditen e sotme, 10 qershor.
I plagosuri është identifikuar si Kristian Gjoni, i cili sipas burimeve paraprake ka marrë një plumb në këmbë. Ai është transportuar menjëherë në spital, ku po merr ndihmën mjekësore dhe fatmirësisht ndodhet jashtë rrezikut për jetën.
Burime pranë hetimit bëjnë me dije se deri në këto momente Gjoni nuk ka dhënë ende dëshmi përpara policisë, çka e bën të paqartë dinamikën dhe rrethanat e ngjarjes.
Forcat e policisë kanë nisur hetimet dhe po punojnë për identifikimin e autorit apo autorëve, si dhe për zbardhjen e plotë të motiveve që çuan në përdorimin e armës së zjarrit.
Pritet që marrja në pyetje e të plagosurit dhe administrimi i provave në vendngjarje të ndihmojnë në sqarimin e plotë të ngjarjes.
