Dy efektivë policie kanë mbetur të plagosur gjatë një operacioni antidrogë të zhvilluar në zonën e Lumalasit, në Korçë.
Sipas informacioneve paraprake, policia ishte vënë në ndjekje të një automjeti që dyshohej se transportonte lëndë narkotike. Burime nga hetimi bëjnë me dije se drejtuesi i mjetit kishte lënë një sasi droge në një lokal në fshatin Lumalas dhe më pas ishte nisur në drejtim të qytetit të Korçës.
Në momentin që ka konstatuar automjetin ku ndodheshin dy agjentët e policisë, i dyshuari mendohet se ka goditur qëllimisht mjetin e tyre për t’i shpëtuar ndjekjes.
Për pasojë, dy efektivët kanë mbetur të plagosur, ndërsa njëri prej tyre ndodhet në gjendje më të rëndë dhe është transportuar për mjekim më të specializuar drejt spitalit të Traumës.
Burimet shtojnë se gjatë largimit nga vendi i ngjarjes, autori ka hedhur në anë të rrugës edhe një sasi të vogël lënde narkotike.
Ndërkohë, policia ka bërë të mundur arrestimin e drejtuesit të automjetit që përplasi efektivët, si edhe të kamarierit të lokalit ku dyshohet se ishte dorëzuar droga. Hetimet vijojnë për zbardhjen e plotë të ngjarjes dhe identifikimin e personave të tjerë të përfshirë në aktivitetin kriminal.
