Kroacia ka marrë tre pikë të rëndësishme në transfertë ndaj Çekisë, duke fituar 2-1 në një ndeshje ku Luka Modric tregoi edhe një herë klasin e tij.
Pjesa e parë ishte e ekuilibruar, me Çekinë të organizuar mirë në mbrojtje dhe Kroacinë që e pati të vështirë të krijonte raste të pastra. Portieri Hornicek u tregua vendimtar në disa momente, sidomos ndaj Luka Sucic.
Gjithçka ndryshoi menjëherë pas pushimit. Modric shfrytëzoi një top të mbetur në hyrje të zonës dhe, sapo gjeti hapësirë, realizoi me një goditje perfekte për t’i dhënë avantazhin Kroacisë.
Çekia reagoi shpejt dhe Karabec barazoi rezultatin, duke e bërë ndeshjen më të hapur. Të dyja skuadrat nisën të kërkonin golin e dytë, por Kroacia krijoi rastet më të mira.
Në fund, Marko Pasalic vendosi sfidën pas një pasimi të mirë të Perisic. Goditja e tij me kokë nuk ishte perfekte, por portieri çek nuk arriti ta largonte topin dhe Kroacia kaloi sërish në avantazh.
Çekia mendoi se kishte barazuar menjëherë pas golit të Pasalic, por VAR-i anuloi golin për një pozicion jashtë loje. Kroacia ruajti avantazhin deri në fund dhe u largua nga Praga me fitoren.
