TIRANË- Seanca paraprake për dosjen ‘Meta’ u shty për më datë 9 tetor. Shkak për shtyrjen e seancës u bë mungesa e avokatit mbrojtës të Ilir Metës, Kujtim Cakrani. Ky i fundit kishte dërguar në sekretarinë e Gjykatës një kërkesë për shtyrje, për shkak të problemeve shëndetësore.
Në sallën e GJKKO ishte e pranishme vetëm ish-deputetja e PL-së, Monika Kryemadhi, ndërsa e ëma e saj dhe ish-bashkëshorti Meta, munguan.
SPAK ka marrë të pandehur Ilir Metën, Monika Kryemadhin, nënën e saj Fatime Kryemadhi, Pirro Xhixhon dhe Ema Çokun, ndërsa do të jetë gjyqtarja Irena Gjoka që do të vendosë nëse dosja do kalojë ose jo për gjykim.
Gjyqtarja Gjoka, u bë objekt sulmi edhe nga partia e Metës, sikurse Sali Berisha, ndërsa mbrojtësi i tij Kujtim Cakrani kërkoi edhe dorëheqjen nga çështja. Sekretari i Përgjithshëm i Partisë së Lirisë, Tedi Blushi aludoi se Gjoka nuk u përzgjodh me short si gjyqtare e seancës paraprake por nga kryeministri Rama dhe kreu i SPAK, Altin Dumani, ndërsa e sulmoi me të njëjtën gjuhë si të Berishës, duke e etiketuar atë si “delikuente recidivizte” dhe “kamikaze anti-opozitare”.
Dhe vetë Gjoka kërkoi dorëheqjen nga çështja e ish-presidentit por nuk iu pranua nga kryetari i GJKKO, Erion Bani.
SPAK mbylli hetimet më 28 korrik, ndërsa dosjen e kaloi për gjykim në fund të gushtit, e cila përfshiu tre hetime në një aferën CEZ-DIA, lobimin e LSI në SHBA dhe hetimin pasuror. Meta dhe Kryemadhi akuzohen për korrupsion pasiv, pastrim parash dhe mosdeklarim pasurie. Pirro Xhixho akuzohet për korrupsion pasiv të funksionarëve të lartë të kryer në bashkëpunim. Ndërsa Fatime Kryemadhi akuzohet për pastrim parash, së bashku me Ema Çokun.
Meta ndodhet në burg që prej tetorit të vitit të kaluar, ndërsa Kryemadhi me detyrim paraqitje. Më 8 shtator, Apeli i GJKKO rrëzoi kërkesën e Metës për lirim nga burgu, duke lënë në fuqi vendimin e 13 gushtit nga Shkalla e Parë, e cila argumentoi se nuk mund të lirohjej për shkak se mund të prishte provat dhe të intimidonte dëshmitarët. Edhe me 19 shtator, pasi paraqiti tjetër kërkesë, GJKKO nuk e ndryshoi masën ndaj tij. Ish-Presidenti ka bërë rekurs edhe në Gjykatën e Lartë, dhe kërkesa do të shqyrtohet më 9 tetor.
Kryemadhi-Meta, tashmë ligjërisht të divorcuar, akuzohen se ndër vite kanë ushtruar pushtetin e tyre për të përfituar pasuri në mënyrë të paligjshme dhe kanë fshehur burimin e tyre duke përdorur edhe familjarët.
