Kryetari i Partisë Mundësia, Agron Shehaj, ka ngritur sot shqetësimin për atë që e cilëson si një rrezik serioz që vjen nga Agjencia Kombëtare e Shoqërisë së Informacionit (AKSHI) në lidhje me sigurinë e të dhënave personale dhe pronësinë e qytetarëve shqiptarë.
Përmes një video-mesazhi të publikuar në rrjetet sociale, Shehaj theksoi se AKSHI administron një sasi të madhe informacioni të ndjeshëm, duke përfshirë të dhëna mbi pronat, shëndetin, biometrinë, lëvizjet, gjobat si dhe llogaritë bankare të qytetarëve. Sipas tij, përqendrimi i këtyre të dhënave në një institucion përbën një kërcënim të madh për sigurinë individuale.
Ai shtoi se ky shqetësim bëhet edhe më i rëndë pas zbulimeve të fundit të SPAK, sipas të cilave AKSHI dyshohet se është nën ndikimin ose kontrollin e bandave kriminale, çka, sipas Shehajt, e rrit ndjeshëm rrezikun për keqpërdorim të të dhënave të qytetarëve.
