Policia e Gjirokastrës ka shoqëruar Gazmend Braçin, si autor i dyshuar i vrasjes së sipërmarrësit italian me biznes në Shqipëri, Edoard Sarchi, ngjarje e ndodhur mesnatën duke u gdhirë e shtuna e 27 shtatorit 2025, në zonën e Salarisë, në Tepelenë.
Deri më tani, autoritetet policore nuk kanë identifikuar motivin e kësaj vrasjeje, ndërkohë që thonë se kanë marrë në pyetje 3 persona që shoqëronin Sarchi-n në udhëtimin e tij për gjueti, në zonën malore të Tepelenës.
Sipas dëshmive paraprake, Gazmend Braçi thuhet se u ka dalë përpara grupit të gjuetarëve, duke tentuar të bllokojë lëvizjen e makinës së tyre. Për arsye ende të pazbardhura publikisht, Braçi dyshohet se ka qëlluar me armë zjarri. Një predhë ka kapur në kokë Edoardo Sarchi-in, duke e lënë të vdekur në vend.
Kur kanë kaluar shumë orë nga ngjarja, Policia e Gjirokastrës ende nuk ka njoftuar për motivin e mundshëm të këtij krimit të rëndë.
Gjithësesi, disa të dhëna indirekte të siguruara nga “Boldnews.al” tregojnë se mes autorit dhe viktimës duhet të ketë pasur njohje. Ose, më së paku, ata kanë pasur një person të njohur të përbashkët.
Financierja, pika e lidhjes
Edoardo Sarchi zhvillon aktivitet tregtar në Shqipëri prej të paktën 25 vitesh. Ai rezulton administrator dhe një prej pronarëve të shoqërisë “Tegola Edilcentro”, me seli në Laprakë të Tiranës dhe me aktivitet prodhim tullash, etj.
Në korrik të vitit 2023, Edardo Sarchi emërohet administrator i shoqërinë “Tegola Edilcentro”. Disa muaj më vonë, në nëntor të atij viti, shoqëria private emëron financieren Majlinda Taga si përfaqësueses e saj për të nënshkruar kontrata me banka të nivelit të dytë.
Sipas dokumentit të regjistruar në Qendrën Kombëtare të Biznesit (QKB), në 5 janar 2024, thuhet se “Asambleja e ortakëve emëron znj. Majlinda Taga, financiere e kompanisë, si përfaqësuese e shoqërisë për firmosjen e të gjithë formularëve dhe kontratave me bankën BKT”.
Ky ishte një vendim rutinor në aktivitetin tregtar dhe raportet mes shoqërisë private të italianit Edoard Sarchi dhe financieren Taga nuk kanë asgjë për t’u theksuar.
Megjithatë, disa të dhëna të tjera të siguruara nga “Boldnews.al” tregojnë se Majlinda Taga është në raporte biznesi me Gazmend Braçin, personin e dyshuar si autor i vrasjes së Edoardo Sarchi.
Gazmend Braçi rezulton bashkëpronar në shoqërinë “Salaria Gaz”, me objekt të aktivitetit veprimtari projektimi, ndërtimi, rikonstruksioni, etj.
Shoqëria “Salaria Gaz” është krijuar në vitin 2014. Sipas të dhënave të Qendrës Kombëtare të Biznesit, shoqëria është aktualisht me statusin “aktiv” dhe bashkëpronarja tjetër është Majlinda Taga, e cila rezulton edhe financiarja e “Tegola Edilcentro”.
Kjo e dhënë është një element për të kuptuar se mes autorit dhe viktimës mund të ketë pasur njohje të mëparshme. Ndërkohë që mbetet për t’u zbardhur nga autoritetet e drejtësisë, krahas provave të pakundërshtueshme për autorësinë, edhe motivi i mundshëm i vrasjes në mesnatë pas gjuetisë./ Boldnews.al
