Mbretëria e Bashkuar, Kanadaja dhe Australia kanë njohur zyrtarisht shtetin palestinez në një përpjekje për të ringjallur zgjidhjen me dy shtete në mes të krizës aktuale në Gaza dhe bllokadës politike në Bregun Perëndimor. Kryeministri britanik, Sir Keir Starmer, theksoi se kjo njohje është një shpresë për paqe dhe mundësinë e krijimit të një shteti palestinez përkrah një Izraeli të sigurt.
Më shumë se 150 vende e kishin njohur tashmë Palestinën, por prania e vendëve perëndimore në këtë grup shikohet si një ndryshim i rëndësishëm politik dhe diplomatik. Megjithatë, Palestina nuk i plotëson të gjitha kriteret për shtetësi sipas Konventës së Montevideos, pasi mungon një territor i përcaktuar dhe një qeveri funksionale. Gaza është goditur rëndë nga lufta, ndërsa Bregu Perëndimor vazhdon të jetë i fragmentuar dhe nën kontroll të pjesshëm izraelit.
Udhëheqja palestineze është e ndarë mes Hamasit, që kontrollon Gazën, dhe Autoritetit Palestinez në Bregun Perëndimor. Presidenti Mahmoud Abbas, në pushtet që nga viti 2005 pa zgjedhje të reja, përballet gjithashtu me kritika, ndërsa Marwan Barghouti, një figurë e njohur, është në burg në Izrael që nga viti 2002. Izraeli, nën udhëheqjen e Benjamin Netanyahut, kundërshton çdo formë të shtetësisë palestineze dhe zbaton politika që forcojnë ndarjen territoriale.
Ndërkohë, Shtetet e Bashkuara dhe aleatët arabë janë duke diskutuar skenarë të ndryshëm për rindërtimin dhe vetëqeverisjen e Gazës, pa përfshirë Hamasin. Megjithëse njohja ndërkombëtare e Palestinës po rritet, çështjet e paqartë lidhur me kufijtë, udhëheqjen dhe të ardhmen e saj mbeten thellësisht të pazgjidhura. Për shumë palestinezë, ndalimi i dhunës dhe vrasjeve që po shkatërron popullin dhe vendin e tyre është më urgjente se çdo diskutim për shtetësi.
