Tarifat gjithëpërfshirëse të shpallura nga presidenti i SHBA-së, Donald Trump, kanë hyrë në fuqi të enjten. Kjo do të thotë se pritet përshkallëzim i luftës tregtare globale.
“Miliarda dollarë nga tarifat po rrjedhin tani në SHBA”, – shkroi Trump në rrjetet sociale, pak para afatit zyrtar në mesnatë.
Sipas administratës amerikane, qëllimi i tarifave është riformësimi i sistemit tregtar global, të cilin Trump e konsideron të padrejtë ndaj SHBA-së.
Ndër masat më të forta është tarifa 50% ndaj Indisë, që do të hyjë në fuqi më 27 gusht nëse ajo nuk ndalon importin e naftës nga Rusia. Ai ka kërcënuar gjithashtu me tarifa 100% për çipat kompjuterikë të prodhuar jashtë vendit, në përpjekje për të nxitur firmat teknologjike që të investojnë brenda SHBA-së.
Ky presion ka dhënë efekt, pasi Apple njoftoi një investim prej 100 miliardë dollarësh në SHBA.
Ndërkohë, vendet me ekonomi të bazuar në eksporte, si Laosi dhe Birmania, janë goditur rëndë me tarifa deri në 40%. Ekspertët thonë se këto masa synojnë kryesisht vendet me lidhje të forta me Kinën.
Disa vende si Britania, Japonia dhe Koreja e Jugut kanë arritur marrëveshje për tarifa më të ulëta, ndërsa të tjerët kanë afat deri më 7 gusht për të negociuar.
