Policia ka arrestuar në flagrancë Andi Gurrën, 26 vjeç, i dyshuar si bashkëpunëtor në plagosjen me armë zjarri të 28-vjeçarit Juglen Abazi, ngjarje e ndodhur më 2 gusht 2025 në zonën e Freskut, në Tiranë.
Sipas hetimeve të deritanishme, Gurra ka bashkëpunuar me Klejvis Cakën (i njohur edhe si Klejvis Lusha), i cili është identifikuar si autor i dyshuar i ngjarjes dhe është shpallur në kërkim nga Policia e Tiranës.
Identifikimi i Cakës është bërë përmes pamjeve të kamerave të sigurisë në zonë, pasi vetë i plagosuri nuk ka dhënë detaje të mjaftueshme për autorin.
Policia njofton se po vijon puna për lokalizimin dhe kapjen e Cakës, si dhe për zbardhjen dhe dokumentimin e plotë ligjor të ngjarjes.
Ngjarja ndodhi mbrëmjen e 2 gushtit në zonën e Freskut, ku Juglen Abazi po lëvizte me automjetin e tij tip “Mercedes” dhe u qëllua me armë zjarri nga Klejvis Caka. Autori, pas kryerjes së plagosjes, është larguar qetësisht nga zona dhe më pas është ndihmuar nga dy bashkëpunëtorët e tij.
I plagosuri ka braktisur menjëherë automjetin dhe, pranë vendngjarjes, ka gjetur kunatin e tij, i cili e ka transportuar me urgjencë në spital, duke i shpëtuar jetën. Abazi ka marrë një plumb në këmbë dhe ndodhet jashtë rrezikut për jetën.
