Aktori i mirënjohur i humorit dhe moderatori i “Fiks Fare”, Julian Deda ishte i ftuar në “Top Story” nga Grida Duma, ku foli për statusin e artistëve para dhe pas viteve 90.
Ai tha se artistët kanë qenë shumë më të vlerësuar moralisht nga publiku edhe pse jo shumë mirë të paguar për shkak të kohës. Sipas tij ata ishin pak më të paprekshëm para viteve 90, ndërsa sot për shkak të rrjeteve sociale publiku di gjithçka për artistët jashtë skene.
Juli rrëfeu një histori që ja kishte treguar babai i tij i ndjerë, aktori i madh Zef Deda. Ai tha se babai i tij i tregonte se kishin disa benefite për shkak se ishin artistë dhe se si kur dilnin në bllok me Ceken dhe Tonin Tershanën, Tonini iu “kapte” gocat sepse kishte zërin e bukur. Pra sipas Julit status quo-ja e artistëve ka ndryshuar.
“Po ta krahasojmë ne me botën, në Shqipëri artistët janë njerëzit më të pavlerësuar në planet. Po të krahasojmë dy kohërat, para 90-ës dhe pas 90-ës, para kanë qenë shumë të vlerësuar moralisht, publiku i ka dashur shumë, kanë qenë personalitete, kanë pasur benefite pafund, ndonjë autorizim, ndonjë shtëpi më të mirë e kështu me radhë.
Financiarisht nuk kanë qenë fare të vlerësuar sepse ashtu ka qenë koha, ndërkohë sot ka aktorë që fitojnë shuma të mira parash. Mirë po, përhapja nëpër rrjete sociale, që janë si miliona sy mbi ty, kam përshtypjen e vetëkonsumon procesin pak më shpejt se në atë kohë. Dhe ti për mua si një aktor humori nuk di vetëm atë që sheh, që mbase dikur nuk i dije si spektator nga Lushnja p.sh, për Zefin nga Shkodra, po flas për gjërat jashtë skenës.
Kurse sot merr vesh çdo gjë, i je futur tjetrit në shtëpi, te vrima e çelësit ke futur syrin, ke futur hundën tek gjella e tij dhe normalisht pjesa artistike e tija duket si, pra thua: “Hë mo ky e bën humorin”. Ndërsa atëherë ishin figura më të paprekshme.
Mua më tregonte një histori Zefi bashkë ata kanë qenë në estradë të ushtarit me Ceken, me Tonin Tërshanën dhe me Koço Devolen. Dhe kur dilnim më thoshte, ngaqë kanë qenë në estradë të ushtarit visheshin si oficerë, jo si ushtarë dhe kishin ca benefite tjera, që mund të kalonin edhe nëpër bllok ndonjëherë dhe thonin që gocat i kapte Tonini ngaqë e kishte zërin e bukur.
Pra atëherë të kishe një zë të bukur, Tonin Tërshana ishte një këngëtar i madh, Cekja dhe Zefi po ashtu shumë të njohur, pra kishe tjetër vlerësim. Kurse sot thotë: “Hë mo mirë”, kush është ai që këndon këtu poshtë”, pra status quo-ja nuk është e njëjtë”, tha Jul Deda.
