Besimtarët myslimanë të Vlorës janë tashmë pa një xhami, si pasojë e përmbytjeve massive që përfshinë qytetin bregdetar një muaj më parë.
Xhamia e Plumbit ka mbyllur dyert e saj për besimtarët, pasi uji ka dëmtuar muret dhe dyshemenë e saj. Për këtë arsye është vendosur që ajo të restaurohet në total.
Ardit Hoxhlleku, me detyrë Myfti i Vlorës ka treguar në një intervistë për mediat dëmet që la pas përmbytja.
“Xhamia e Plumbit është monument kulture i kategorisë së parë dhe, siç e dimë, më 4 tetor u bë një përmbytje në të gjithë Vlorën ku u prek dhe xhamia, pasi morëm një ekspertizë nga komisioni i verifikimeve të komunitetit mysliman të Shqipërisë, por edhe nga Ministria e Kulturës, ta mbajmë mbyllur për shkak të rrezikut që ka në frekuentimin e saj. Sepse dëmtimet janë si nga kupola, por edhe nga muret, tani jemi në përpjekje, duke biseduar me TIKËN. Gjithashtu dhe me Ministrinë e Kulturës, për të bërë një restaurim të përgjithshëm. Ne dëshirojmë ta mbajmë, ta ngremë përsëri në këmbë, sepse është gati 500-vjeçare dhe është një nga xhamitë më të veçanta në Ballkan, e ndërtuar nga arkitekti Sinani me origjinë shqiptare”, tha Arditi.
Imami u kërkoi mirëkuptim besimtarëve deri në përfundim të restaurimit të dëmeve.
