Kryeministri Edi Rama ka përcjellë një mesazh urimi në ditën e parë të vitit të ri shkollor.
Përmes një postimi në rrjetet sociale, Rama u ka uruar një vit të mbarë nxënësve, mësuesve dhe drejtuesve të shkollave, duke përfshirë në urimin e tij edhe prindërit që shoqërojnë fëmijët në këtë ditë të veçantë.
“Mirëmëngjes dhe me urimin për një vit të mbarë shkollor nxënësve, mësuesve, drejtuesve të shkollave, e padyshim edhe vetë prindërve që sot nisin fëmijët në shkollë, ju uroj të gjithëve një javë sa më të mirë”, shkruan Rama.
Në postimin e tij, kryeministri ka ndarë edhe pamje nga disa prej shkollave të rikonstruktuara dhe të transformuara këtë vit, me kushte dhe standarde të reja për nxënësit dhe mësuesit.
Bëhet fjalë për shkollat “Mersin Duqi”, “Edith Durham”, “Murat Toptani” dhe “Ibrahim Hima”, të cilat janë ndër institucionet arsimore që kanë pësuar ndërhyrje dhe përmirësime në infrastrukturë.
