Presidenti i Republikës, Bajram Begaj, ka uruar nxënësit dhe mësuesit me rastin e nisjes së vitit të ri shkollor.
Përmes një mesazhi, Begaj u ka uruar suksese të gjithë nxënësve në këtë fillim të ri, duke veçuar veçanërisht fëmijët që ulen për herë të parë në bankat e shkollës.
Presidenti theksoi rëndësinë e shkollës jo vetëm si një vend ku merret dije, por edhe si hapësirë ku të rinjtë përgatiten për të ardhmen, mësojnë të njohin vendin dhe historinë e tyre, si dhe të çmojnë kulturën dhe vlerat.
Mesazhi i Begaj:
Sot nis viti i ri shkollor për mijëra nxënës në të gjithë vendin.
Çdo vit, çdo ditë e re në shkollë është një mundësi për të mësuar, për të zbuluar, por edhe për të ëndërruar.
Shkolla nuk është thjesht një vend ku marrim dije. Është vendi ku përgatitemi të marrim përgjegjësi, ku mësojmë të njohim botën, të njohim vendin tonë, të kuptojmë historinë e tij, të çmojmë kulturën dhe vlerat e të kuptojmë misionin që kemi për të ardhmen e tij.
Uroj të gjithë nxënësit, veçanërisht ata që ulen për herë të parë në bankat e shkollës, të kenë një vit të mbarë, të suksesshëm dhe të bukur!
Një urim i veçantë për mësuesit, të cilët me përkushtim, durim dhe dashuri kryejnë një detyrë jashtëzakonisht të rëndësishme, për të cilën e gjithë shoqëria jonë u është thellësisht mirënjohëse!
Të dashur nxënës,
Besoni te vetja, besoni tek ëndrrat tuaja dhe tek e ardhmja. Ajo do të jetë më e mirë dhe është në duart tuaja!
