Parku Kombëtar i Vjosës, i shpallur dy vite më parë si “lumi i fundit i egër në Evropë”, po përballet sot me një kërcënim të madh mjedisor. Sasi të mëdha nafte janë derdhur në zonën e mbrojtur, duke rrezikuar seriozisht jetën e egër dhe ekosistemin unik që e karakterizon këtë pasuri natyrore.
Alarmin e ka dhënë Ulrich Eichelmann, CEO i organizatës ndërkombëtare “Blue Heart”, i cili ka denoncuar publikisht ndotjen që po shkaktojnë impiantet e naftës dhe asfaltit në kufijtë e parkut. Pamje të publikuara nga faqja zyrtare Blue Heart Rivers në Instagram tregojnë për një situatë dramatike, me naftë dhe mbetje industriale që derdhen në ujërat e lumit Vjosa, duke e shndërruar zonën në një pikë të zezë ndotjeje.
“Vetëm pak litra naftë mund të ndotin mijëra litra ujë. Ajo që derdhet këtu është shumë më tepër. Kjo është shkelje e rëndë, jo vetëm ndotje,” deklaron Eichelmann, i cili e cilëson situatën si “shembulli më i keq i shkatërrimit të një lumi” që ka parë ndonjëherë.
Denoncimi vjen në një kohë kur qeveria shqiptare po përgatitet të aplikojë për përfshirjen e Vjosës në listën e trashëgimisë botërore të UNESCO-s, si pjesë e programit “Njeriu dhe biosfera”. Vetëm dy javë më parë, ministrja Mirela Kumbaro dhe kryeministri Rama e përshkruan këtë nismë si një moment krenarie kombëtare. Por, ndotja e fundit mund të vërë seriozisht në pikëpyetje këtë status të shumëpritur.
Organizata “Blue Heart Rivers” i bën thirrje qeverisë shqiptare të kalojë nga fjalët në vepra dhe të marrë masa urgjente për ndalimin e ndotjes, mbylljen e impianteve dhe pastrimin e zonës. “Ta mbajmë Vjosën të egër, jo të mbuluar nga nafta,” përfundon reagimi i tyre.
