Shqipëria renditet e shtata në botë për çmimin më të lartë të naftës, me mbi 2 dollarë për litër. Në rajonin e Ballkanit Perëndimor, ajo mban vendin e parë, me një diferencë të ndjeshme nga vendi i dytë, Serbia.
“Krahasuar me Kosovën, Maqedoninë apo Malin e Zi, çmimet janë shumë më të larta. Është bërë e papërballueshme,” thotë një qytetar.
Në krahasim me Bosnjë-Hercegovinën, Maqedoninë e Veriut dhe Kosovën, një litër naftë në Shqipëri kushton pothuajse dyfish.
Në rang europian, Shqipëria është në vendin e pestë për çmimin më të lartë të naftës, duke lënë pas shtete si Norvegjia, Finlanda dhe Irlanda. Ndër vendet që kryesojnë janë Islanda, Lihtenshtajni dhe Danimarka.
“Naftës i ka ikur mendja… Çmimet janë rritur shumë, sidomos kur krahasohen me pagat që marrim,” shprehet një tjetër qytetar.
Çmimi për litër përfshin si koston në tregjet ndërkombëtare ashtu edhe taksat dhe tarifat e vendosura nga qeveria. Edhe pse çmimi në bursa ka pësuar rritje të lehtë, zhvlerësimi i dollarit do të duhej të sillte ulje të çmimeve të karburanteve.
Gjithsesi, importet e karburantit kanë arritur nivele rekord. Sipas të dhënave të Ministrisë së Financave dhe Ekonomisë, gjatë periudhës janar-maj janë importuar afro 280 mijë tonë karburant, një rritje prej 12.8% krahasuar me të njëjtën periudhë të vitit të kaluar.
