Gjatë fundjavës që lamë pas, bota ishte me sytë nga Lindja e Mesme, teksa tensionet mes Iranit dhe Izraelit kulmuan me sulme të ndërsjella ajrore. Pamje të raketave që ndriçonin qiellin dhe godisnin ndërtesa shumëkatëshe u shpërndanë dhe komentuan gjerësisht në rrjetet sociale dhe mediat ndërkombëtare.
Por duket se pamje të ngjashme me ato të konflikteve në Lindjen e Mesme janë regjistruar edhe në qiellin shqiptar.
Të paktën dhjetëra qytetarë nga Tirana, Elbasani, Lezha dhe Shkodra kanë raportuar se kanë parë objekte të ndritshme që përshkonin qiellin rreth orës 03:00 deri në 04:00 të mëngjesit, duke lënë pas një gjurmë të zjarrtë – ngjashëm me trajektoren e një rakete ose objekti që digjet në atmosferë.
Pamjet e mbërritura në redaksinë tonë e konfirmojnë praninë e një objekti të çuditshëm që lëviz me shpejtësi të lartë, duke ndezur qiellin për pak sekonda. Megjithatë, origjina e saktë e këtij fenomeni mbetet e paqartë.
Nuk përjashtohet mundësia që të bëhet fjalë për mbetje raketash ose një meteor që ka hyrë në atmosferë. Por, në kushtet e tensionit global dhe pas pamjeve dramatike nga Lindja e Mesme, për shumë qytetarë kjo skenë ka ngjallur frikë dhe pasiguri.
Autoritetet nuk kanë dhënë ende një reagim zyrtar mbi këtë ngjarje, ndërsa qytetarët kërkojnë më shumë transparencë dhe informim.
