Aplikacionet e njohjeve nuk po përdoren më vetëm për të gjetur partnerë romantikë. Një industri e re po zhvillohet rreth një nevoje tjetër: krijimit të miqësive. Platforma të ndryshme po organizojnë takime mes njerëzve që nuk njihen, duke i bashkuar në grupe të vogla për darka, aktivitete apo dalje në qytet.
Një prej rasteve të fundit është ai i një gruaje 33-vjeçare në Honolulu, e cila pagoi 290 dollarë për t’u njohur me tetë gra të tjera përmes një shërbimi të quajtur Real Roots. Pas plotësimit të një pyetësori për personalitetin dhe interesat, pjesëmarrëset u përzgjodhën për të kaluar një mbrëmje së bashku. Ndërkohë, aplikacione si Bumble BFF dhe Timeleft po përdorin gjithnjë e më shumë këtë model për të krijuar lidhje shoqërore jashtë botës virtuale.
Fenomeni lidhet me vështirësinë që shumë të rritur hasin për të krijuar miqësi të reja pas përfundimit të studimeve, ndryshimit të qytetit apo largimit nga rrethi i mëparshëm shoqëror. Megjithatë, takimet nuk garantojnë se do të lindë një miqësi e qëndrueshme. Për shumë njerëz, ato janë thjesht një mundësi për të dalë nga rutina, për të njohur persona të rinj dhe për të zgjeruar rrethin shoqëror.











