Ideja për të pasur një parfum të vetëm karakteristik po zëvendësohet nga një trend i ri në industrinë e bukurisë: përzierja e disa aromave për të krijuar një parfum personal. I njohur si “fragrance layering” ose “scent stacking”, ky trend po përhapet veçanërisht mes brezit Z dhe Millennials, të cilët nuk duan më të mbajnë të njëjtën aromë në çdo moment të ditës.
Praktika është e thjeshtë: një aromë vaniljeje mund të kombinohet me nota agrumesh për një rezultat më të freskët, ndërsa një parfum me misk mund të përdoret për t’i dhënë më shumë butësi një arome të ëmbël. Disa krijojnë kombinime edhe duke përdorur vajra aromatikë, kremra trupi dhe parfume të ndryshme. Sipas të dhënave të Pinterest, kërkimet për kombinime parfumesh janë rritur me 125 për qind, ndërsa ato për përzierjen e aromave me 75 për qind.
Trendi po ndryshon edhe mënyrën se si njerëzit blejnë parfume: në vend të një shisheje të vetme, ata po ndërtojnë një koleksion aromash për humor, stinë dhe raste të ndryshme. Kështu, parfumi po kthehet nga një produkt bukurie në një mënyrë personale të shprehjes së identitetit.











