Zvicra mori një fitore të rëndësishme në Botëror, duke mposhtur Bosnjë-Hercegovinën me rezultatin 4-1 në Grupin B. Skuadra e Murat Yakin e zhbllokoi ndeshjen në pjesën e dytë dhe më pas dominoi plotësisht takimin.
Pjesa e parë u mbyll pa gola, me ritëm të ulët dhe me pak raste të pastra. Zvicra mbajti më shumë iniciativën, por nuk arriti të krijonte shumë rrezik para portës së Vasilj.
Gjithçka ndryshoi pas ndërhyrjeve nga stoli. Manzambi, i futur në fushë në minutën e 72-të, shënoi vetëm dy minuta më vonë dhe i dha avantazhin Zvicrës. Më pas Vargas dyfishoi rezultatin me një goditje diagonale, ndërsa Bosnja mbeti me 10 lojtarë pas kartonit të kuq të Muharemovic.
Në fundin e ndeshjes, Manzambi shënoi edhe golin e dytë personal për 3-0. Bosnja reagoi me Mahmic, i cili ngushtoi përkohësisht rezultatin, por Zvicra e mbylli ndeshjen me golin e katërt nga pika e penalltisë, të realizuar nga Granit Xhaka.
Me këtë fitore, Zvicra merr një sukses të madh në Grupin B dhe hedh një hap të rëndësishëm drejt kualifikimit, ndërsa Bosnja largohet me një humbje të rëndë dhe me shumë probleme për ndeshjen e fundit.
