Të tjera detaje janë zbardhur lidhur me identitetin e dy viktimave (babë e bijë) që mbrëmjen e djeshme humbën jetën në një aksident tragjik në Lezhë.
Bëhet e ditur se Anton Keçi 52-vjeç punonte si shef i Shëndetësisë në burgun e Lezhës, ndërsa e bija 20-vjeçare Bora Keçi, po ndiqte gjurmët e tij në Mjekësi pasi ishte studente në vitin e dytë të fakultetit.
Anton Keçi ka shërbyer për 6 vite në sistemin penitenciar, thuhet në një reagimi të bërë mbrëmë nga Drejtoria e Burgjeve, që shpreh ngushëllimet për këtë ngjarje të rëndë.
“Me dhimbje të thellë njoftojmë se më datë 25.04.2026, në orët e mbrëmjes, në aksin rrugor Lezhë–Gjadër, në vendin e quajtur Gocaj, si pasojë e një aksidenti tragjik ku automjeti ka dalë nga rruga, kanë humbur jetën Dr. Anton Keçi, 52 vjeç, Shef i Shëndetësisë në IEVP Lezhë, si dhe vajza e tij 20-vjeçare, studente në vitin e dytë në Fakultetin e Mjekësisë.
Dr. Keçi shërbeu me përkushtim për rreth 6 vite në sistemin penitenciar, duke lënë pas vlerësim profesional dhe njerëzor tek kolegët dhe të gjithë ata që e njohën.
Në këto momente të rënda, shprehim ngushëllimet më të sinqerta për familjen, kolegët dhe të afërmit. Jemi pranë bashkëshortes dhe djalit të tij, duke ndarë dhimbjen e madhe për këtë humbje të parakohshme dhe të pazëvendësueshme”, thuhet në postim.
Ishin familjarët që të alarmuar pasi humbën kontaktet, vunë në dijeni policinë, e cila pas disa orësh kërkime gjeti makinën që kishte dalë nga rruga dhe kishte përfunduar në një kanal me ujë.
