Pas mbledhjes së Këshillit të Imunitetit para disa ditësh, ku u shqyrtua kërkesa e SPAK për arrestimin e zv.kryeministres Belinda Balluku, kryeministri Edi Rama ka mbledhur sot, 26 shkurt, Grupin Parlamentar të Partisë Socialiste, duke e vendosur çështjen në qendër të diskutimeve politike.
Në fjalën e tij para deputetëve socialistë, Rama e konsideroi momentin si një “udhëkryq” për vendin, duke theksuar se busulla e vetme e shumicës qeverisëse mbetet integrimi i Shqipërisë në Bashkimin Europian.
Kreu i qeverisë theksoi se Partia Socialiste është forca që garantoi pavarësinë reale të pushtetit gjyqësor, por paralajmëroi se kjo pavarësi nuk duhet të cenojë balancën mes pushteteve. Sipas Ramës, Shqipëria ndodhet në një moment historik drejt anëtarësimit në BE dhe shumica duhet të qëndrojë e përqendruar në këtë objektiv, pavarësisht tensioneve politike dhe zhvillimeve të fundit.
Rama: Në këtë udhëkryq kemi një busull që është e pagabueshme, që është Shqipëria në BE. Sot jemi më afër anëtarësimit dhe këtë e them faktikisht. Jo metaforikisht. Jam besimplotë që do ta kalojmë këtë test. Pavarësisht shkopinjve nën rrota dhe tymit të bombave artizanale që plasnin përditë duke hedhur përpjetë kapakët e 700 tenxhereve mediatike. E ka thënë populli qysh se asnjë prej nesh s’kishte lindur akoma, se ‘kur gënjeshtra ka bërë xhiron e botës, e vërteta s’ka veshur akoma pantallonat’. Duhet të përqendrohemi vetëm në një pikë, Shqipërinë në BE dhe asgjë tjetër.
Sot rruga e Shqipërisë dhe yjet që janë bashkuar bashkë e kanë sjellë që ne të jemi me historinë në duart tona dhe ta shkruajmë me mendjen dhe me forcën tonë. Shqipërian në BE nuk është një tjetër etapë e zhvillimit të vendit, është histori dhe padiskutim që nuk është e lehtë të përqendrohesh në kushtet kur përtej zhurmës së përditshme të bombave artizanale që plasin, ka flluar edhe një lëvizje sportive prokurorësh të clët janë turrur për mandatin e ardhshëm të SPAK duke prerë fletëarreste në tufa, ku në rastin më të mirë nuk janë fare çështje penale dhe në rastin më keq hetohen në gjendje të lirë.
Ne e besojmë që kur Kushtetuta demokratike e Shqipërisë dhe Kushtetutat e Evropës ku duam të behemi pjesë thonë ka tre pushtete të pavarura. Këto pushtete të pavaruara nuk mund të jenë në letër siç ishin përpara se sa ne të bënim gjithçka që kemi bërë. Kjo parti i hyri detit në këmbë dhe pas 100 e ca vjetësh ne i dhamë pavarësinë reale pushtetit gjyqësor. Unë nuk bëhem kurrë pishman, pavarësisht lloj lloj bombash artizanale që kurdisen nga lloj lloj prokurorësh dhe gjykatësish të cilët shija e pavarësisë reale i deh, u mjegullon arsyen dhe i nis në drejtim që cenojnë pavarësinë e pushteteve të tjera.
