Me lot në sy, 65-vjeçari Bardhosh Haxhiraj rrëfen momentet dramatike kur zjarri përfshiu stallën e tij në fshatin Armen të bashkisë së Selenicës. Në stallë ndodheshin 16 lopë, 4 viça dhe 2 dele, të cilat u përfshinë nga flakët.
Sipas tij, gjithçka nisi nga një shkëndijë elektrike që më pas shpërtheu në flakë, duke djegur me shpejtësi të gjithë objektin. Zjarri fillimisht përfshiu tavanin dhe më pas u përhap në pjesën e poshtme ku ndodheshin bagëtitë. Bardhoshi tentoi të hynte brenda për të shpëtuar kafshët, por tymi dhe flakët e dendura nuk e lejuan.
Ai shprehet se dëmi është kolosal. Vetëm vlera e lopëve llogaritet rreth 50 milionë lekë të vjetra, ndërsa bashkë me stallën, dëmi total arrin në rreth 300 mijë euro. 65-vjeçari kërkon ndihmë për të përballuar këtë humbje të madhe.
Edhe vëllai i tij, i cili merret me blegtori, thekson se situata është shumë e vështirë për familjen, sidomos kur raste të tilla përsëriten rralle ne fshatin Armen, të bashkisë së Selenicës.
Në vendngjarje kanë mbërritur autoritetet përkatëse, të cilat kanë bërë vlerësimin paraprak të dëmit, si dhe përfaqësues të Drejtorisë së Bujqësisë pranë qytetit të Vlorës.
