Kelmend Tershalla, një 22-vjeçar shqiptar, është dënuar me 25 muaj burg në Mbretërinë e Bashkuar pas arrestimit të tij për posedim të drogës dhe promovim të jetesës kriminale nëpërmjet mediave sociale. Tershalla u arrestua në High Wycombe, Buckinghamshire, vitin e kaluar, kur policia realizoi një kontroll antidrogë mbi automjetin e tij. Gjatë kontrollit, forcat e rendit gjetën 6 doza kokainë, 31 kavanoza me kanabis dhe 5 pako me cigare elektronike me kanabis. Po ashtu, ai kishte në posedim 319 paund cash dhe një telefon celular, nga ku u zbuluan mesazhe që tregonin se ai ishin duke furnizuar konsumatorë me drogë.
Gjyqtari, duke e kritikuar Tershallën për postimet e tij arrogante në internet, ku shfaqej me para dhe armë, theksoi se këto sjellje tregojnë papjekuri. Tershalla, i cili u prezantua në gjykatë me ndihmën e një përkthyesi, pranoi fajësinë për posedim droge të klasit A me qëllim shitjen si dhe për posedimin e pasurisë kriminale. Avokati i tij, Rhys Rosser, argumentoi se 319 paund cash nuk ishin tregues i një fitimi të konsiderueshëm dhe se ai është ndikuar nga persona të tjerë në veprimet e tij.
Gjyqtari Simon Dyer KC e pranoi se Tershalla kishte luajtur një rol më të vogël në rrjetin e drogës, por u shpreh se veprimet e tij ishin të papërgjegjshme dhe arrogante. Ai nënvizoi se ky ishte dënimi i parë i Tershallës në Britani dhe e paralajmëroi atë se një dënim i ardhshëm do të ishte shumë më i rëndë nëse ai do të përsëriste krime të tilla.
Ky rast nxjerr në pah problematikën e trafikut të drogës mes të rinjve dhe sfidat e medieve sociale në promovimin e një stili jetese kriminale, duke bërë thirrje për vëmendje më të madhe nga autoritetet dhe shoqëria.
