Instituti Hidrometeorologjik i Kosovës (IHMK) ka publikuar një raport mbi gjendjen e lumenjve pas reshjeve të dendura që kanë shkaktuar vërshime në disa komuna të vendit. Sipas IHMK-së, nga e hëna deri të martën në Kosovë kanë rënë mesatarisht rreth 43 mm reshje për metër katror.
Sasitë më të mëdha të reshjeve janë regjistruar në pellgun e Drinit të Bardhë me 76.2 mm, ndërsa në pellgjet e tjera niveli i reshjeve ka qenë më i ulët: Ibri 27.8 mm, Morava e Binçës 19.9 mm dhe Lepenci 47.9 mm.
Si pasojë, shumica e lumenjve në perëndim dhe qendër të Kosovës kanë shënuar rritje të ndjeshme të nivelit të ujit. Lumenj si Drini i Bardhë, Ereniku dhe Bistrica e Deçanit kanë dalë nga shtrati, duke shkaktuar përmbytje lokale. Ndërkohë, lumenjtë në lindje dhe jug të vendit, përfshirë Ibrin dhe Sitnicën, kanë pasur vetëm rritje të lehta dhe aktualisht nuk paraqesin rrezik të menjëhershëm.
IHMK paralajmëron se reshjet e shiut pritet të vazhdojnë edhe në ditët në vijim, çka mund të rrisë rrezikun për përmbytje të reja, veçanërisht në zonat tashmë të prekura. Autoritetet dhe qytetarët ftohen të tregojnë kujdes të shtuar dhe të ndjekin njoftimet zyrtare, pasi përmbytjet mund të shkaktojnë dëme në pasuri dhe infrastrukturë.
