Gratë në rrjetet sociale kanë dalë në mbrojtje të aktores Catherine Zeta-Jones, pas kritikave që ajo mori për pamjen e saj gjatë një eventi në tapetin e kuq. Zeta-Jones mori pjesë në një ngjarje të Netflix në Los Anxhelos, ku një intervistë e publikuar në TikTok për rolin e saj në sezonin e ri të serialit “Wednesday” u shoqërua me komente negative nga ndjekësit, të fokusuar kryesisht te pamja e saj fizike.
Laura White, 58 vjeç dhe fituese e titullit Miss Great Britain Classic, e cilësoi këtë reagim si “absurditet të plotë”, duke theksuar se gratë përballen me një presion shumë më të madh për pamjen e jashtme krahasuar me burrat. Sipas saj, shoqëria shpesh i trajton gratë sikur të kenë një “datë skadence”, veçanërisht kur bëhet fjalë për figurat publike.
Kritikat kanë nxitur një valë të gjerë mbështetjeje për aktoren, me shumë përdorues që dolën hapur në mbrojtje të saj. Një video e bërë virale nga një përdoruese në Facebook argumentonte se gratë kritikohen si për ndërhyrje estetike të dukshme, ashtu edhe kur shfaqen natyrale, duke e quajtur këtë standard të dyfishtë të padrejtë.
Shumë komentues theksuan se sulmet janë të pabazuara. Disa i cilësuan reagimet si mungesë respekti ndaj “plakjes natyrale”, ndërsa të tjerë vlerësuan pamjen dhe prezencën e Zeta-Jones, duke theksuar se ajo duket e sigurt dhe dinjitoze për moshën e saj. Mbështetja publike u pa si një mesazh më i gjerë kundër presionit dhe gjykimeve të vazhdueshme ndaj grave në hapësirën publike.
