Komisioni Evropian ka paraqitur një paketë legjislative me fokus në luftën kundër trafikimit të narkotikëve, një aktivitet kriminal që po ndikon gjithnjë e më shumë në jetën e qytetarëve të Evropës, duke shkaktuar dhunë, korrupsion, ndotje ambientale dhe shfrytëzim të ekonomisë ligjore. Komisioneri për Çështjet e Brendshme të BE-së, Magnus Brunner, njoftoi se përdorimi i drogës ka shkuar në një nivel “krize” në BE, me rreth 7,500 viktima çdo vit për shkak të drogës.
Në vitin 2023, janë konfiskuar 419 tonë kokainë në Evropë dhe çdo vit prishen 500 laboratorë të drogës sintetike. Më shumë se gjysma e rrjeteve kriminale më të rrezikshme është e angazhuar në trafikimin e drogës. Për t’iu kundërvënë këtyre rrjeteve, Komisioni ka propozuar një Strategji për Drogat të BE-së dhe një Plan Veprimi me 19 masa operacionale kyçe.
Disa nga prioritetet përfshijnë forcmimin e bashkëpunimit ndërkombëtar me vendet e treta dhe rritjen e bashkëpunimit mes autoriteteve të zbatimit të ligjit, drejtësisë dhe doganave në vendet anëtare të BE-së. Brunner theksoi nevojën për adaptimin e masave kundër narkotikëve, duke përmendur përdorimin e teknologjive të përparuara nga trafikantët. Ai njoftoi gjithashtu një “kampus inovacioni” për testimin e teknologjive të përparuara për të ndërprerë trafikimin e drogës, i cili do të nisë në vitin 2026.
Mjetet ajrore, imazhet satelitore me rezolucion të lartë dhe dronët do të ofrohen nga agjencia evropiane e kufijve dhe bregdetit, Frontex. Për të parandaluar krimin dhe për të reduktuar dhunën e lidhur me drogën mes të rinjve, Komisioni ka propozuar gjithashtu një platformë evropiane që lidh ekspertë për të luftuar rekrutimin online, ndërsa një bazë të dhënash për substancat do të ndihmojë autoritetet kombëtare në identifikimin e drogëve të reja.
Roli i Europol do të jetë thelbësor për forcimin e ndarjes së informacionit dhe koordinimin e hetimeve të përbashkëta. Brunner përfundoi duke thënë se BE-ja është në harmoni me vendet anëtare dhe po përpiqet të ndihmojë në realizimin e objektivave të vendosura.
