Mijëra njerëz protestuan të hënën në kryeqytetin bullgar Sofje dhe në disa qytete të tjera, kundër projektbuxhetit të vitit 2026 i pari i hartuar në euro, para se vendi anëtar i Bashkimit Evropian ta adoptojë monedhën e përbashkët më 1 janar.
Disa protestues u përplasën me policinë, e cila kishte rrethuar zyrat e partive në pushtet në Sofje, ndërsa ndaj efektivëve u hodhën gurë, shishe dhe kapsolla.
Më 28 nëntor, pas protestave të ngjashme, qeveria minoritare e Rosen Zhelyazkov u zotua se do ta paraqiste sërish projektbuxhetin e 2026-ës në parlament, me synimin për të krijuar më shumë kohë për konsultime me opozitën, sindikatat dhe përfaqësuesit e biznesit. Një komision parlamentar e kishte miratuar projektin në parim më 18 nëntor.
Partitë e opozitës dhe organizata të tjera thanë se protestonin kundër planeve të qeverisë për rritjen e kontributeve të sigurimeve shoqërore dhe tatimit mbi dividentët për të financuar shpenzimet më të larta, si edhe kundër korrupsionit shtetëror.
Rreth gjysma e bullgarëve kundërshtojnë futjen e euros, nga frika se kjo do të cënojë sovranitetin e vendit dhe se tregtarët do të shfrytëzojnë kalimin nga leva në euro për të rritur çmimet.
Presidentja e Bankës Qendrore Evropiane, Christine Lagarde, paralajmëroi këtë muaj se inflacioni mund të pësojë rritje kur shteti ballkanik t’i bashkohet eurozonës.
