Gjatë një konference në Argjentinë, presidenti i La Liga-s, Javier Tebas, diskutoi situatën aktuale të kampionatit pas largimeve të superyllinjve botërorë, Lionel Messi dhe Cristiano Ronaldo. Ai shprehu preferencën për t’i pasur në ligë këta lojtarë, por insistoi se forca e një konkurrencë varet më shumë nga klubet dhe konkurrueshmëria sesa nga individualitetet. “Do doja t’i kisha Messi, Cristiano, Mourinho, Guardiola, të gjithë… Por kjo nuk është çelësi për të mbështetur rritjen. Lojtarët janë të përkohshëm; ajo që e bën një ligë të madhe janë klubet dhe konkurrenca e fortë,” tha Tebas.
Ai përdori Ligën Saudite si shembull për të mbështetur argumentin e tij, duke sugjeruar se prurjet e lojtarëve të mëdhenj nuk garantojnë statusin e një lige si një nga më të mirat në botë. “Merrni rastin e ligës saudite, që ka yje të mëdhenj, por akoma nuk ka arritur të bëhet ndër më të mirat në botë,” theksoi ai. Tebas siguroi se modeli strukturor i La Liga-s dhe rregullat e rrepta për kufizimin e pagave kanë ruajtur rritjen e saj, dhe se kontratat me transmetuesit kanë mbetur të qëndrueshme edhe pas largimit të Messi-t.
Ai theksoi se La Liga mbetet liga e dytë më e mirë në Evropë pas Premier League dhe se po e ngushton diferencën. “Në Evropë, Premier League është në krye, por ne jemi pas tyre. Poshtë nesh janë Bundesliga, Serie A dhe liga franceze. Mund ta shihni edhe në numrin e ndjekësve dhe angazhimit në rrjetet sociale. Ne po rritemi çdo ditë, duke zgjeruar diferencën me konkurset e tjera dhe duke ngushtuar distancën me Premier League-n,” përfundoi Tebas.
Kjo vë në dukje angazhimin e La Liga-s për të ruajtur cilësinë dhe për të përmirësuar statusin e saj në arenën europiane, pavarësisht sfidave që sjellin largimet e lojtarëve të mëdhenj.
