Banorët e fshatit Guri i Bardhë, në njësinë administrative Xibër të Bashkisë Klos, po përballen me një situatë alarmante: mungesa totale e ujit të pijshëm që prej muajit maj.
Kjo situatë ka ardhur pas ndërtimit të një rrjeti të ri ujësjellësi, i cili përfundoi një vit më parë, por që nuk ka sjellë përmirësime në furnizimin me ujë.
Sipas banorëve, ata ndiheshin të siguruar me ujë falë një investimi privat para ndërtimit të ujësjellësit të ri. Tani, pusetat janë lënë në gjendje të keqe, duke shkaktuar ndotje dhe probleme me shkarkimet që dalin në rrugë.
Këta banorë shprehen se, ndonëse kanë lidhur kontrata për furnizim me ujë, realiteti është i ndryshëm. Kryeplaku i fshatit shpreh shqetësimin se problemet janë rritur dhe se ndihma nga deputetët ka qenë e pavlefshme.
Sipas dokumenteve, projekti për ndërtimin e ujësjellësit ka filluar në prill të vitit 2023, me një vlerë prej 219 milionë lekësh dhe një afat pune prej 12 muajsh.
Administratori i kompanisë ndërtuese, Demir Boriçi, shpjegon se mungesa e ujit është e lidhur me ndërhyrjet në linjën kryesore dhe përdorimin të lartë për vaditje, duke mos e mbuluar sasinë e nevojshme për konsum. Ai thekson se punimet janë dorëzuar dhe janë brenda garancisë.
Në një përgjigje nga UK Bulqizë dhe UK Dibër, autoritetet konfirmojnë se ujësjellësi është në periudhë garancie, por me disa probleme. Një lidhje e paligjshme në linjën kryesore është identifikuar dhe po punohet për të siguruar furnizimin e rregullt të ujit për të gjithë banorët.
Banorët, gjithsesi, mbajnë shpresë se pas ndërhyrjeve të institucioneve, do të arrijnë të kenë përsëri ujë të pijshëm. “Faleminderit Fiks Fare, shpresojmë që këtë herë problemi i ujit të zgjidhet përfundimisht,” shprehet kryeplaku.
