Gjysmëfinalet e Champions League për sezonin 2025/26 tashmë janë përcaktuar, me katër skuadra nga katër kampionate të ndryshme: Franca, Gjermania, Spanja dhe Anglia. Përballjet do të jenë PSG kundër Bayern Munich dhe Atletico Madrid kundër Arsenal.
Ndeshja e parë gjysmëfinale mes PSG dhe Bayern Munich do të luhet më 28 prill në Paris, ndërsa një ditë më pas, më 29 prill, Atletico Madrid do të përballet me Arsenal në Madrid.
Sa i takon ndeshjeve të kthimit, Arsenal do ta presë Atletico Madrid në Londër më 5 maj, ndërsa Bayern Munich do të luajë ndaj PSG në shtëpi më 6 maj.
Bëhet fjalë për dy përballje shumë interesante dhe me histori të veçantë, edhe pse jo të gjitha skuadrat kanë të njëjtën peshë europiane. Bayern Munich numëron gjashtë trofe të Champions League, PSG ka një, ndërsa Atletico Madrid dhe Arsenal ende nuk e kanë fituar këtë kompeticion.
Pa dyshim, dueli mes Bayern Munich dhe PSG konsiderohet si një nga përballjet më tërheqëse. Të dy skuadrat janë kthyer në rivalë të shpeshtë vitet e fundit dhe janë ndeshur edhe në fazën e ligës këtë sezon, ku Bayern fitoi 2-1 në “Parc des Princes”.
Po ashtu, kujtohet edhe sfida mes tyre në çerekfinalet e Kupës së Botës për Klube në Atlanta, ku PSG triumfoi 2-0, në një ndeshje që u shënua edhe nga dëmtimi i rëndë i Musiala pas përplasjes me Donnarumma.
Sezonin e kaluar, PSG humbi sërish në Mynih gjatë fazës së grupeve, por më vonë arriti të fitonte trofeun pikërisht në atë stadium, aty ku tani do të kërkojë një tjetër finale. Dy sezone më parë, Bayern eliminoi PSG në raundin e 1/8-ve, duke fituar si në Paris ashtu edhe në Gjermani.
Nga ana tjetër, Atletico Madrid dhe Arsenal do të përballen për herë të tretë në Europë. Takimi i fundit mes tyre erdhi më herët gjatë këtij sezoni, kur Arsenal fitoi thellë 4-0. Megjithatë, Atletico ka kujtime shumë të mira nga përballja e mëparshme në gjysmëfinalen e Europa League 2017/18.
Atëherë, ndeshja e parë në Londër përfundoi 1-1 pas golit të Griezmann, ndërsa në kthim Atletico fitoi 1-0 me golin e Diego Costa dhe siguroi finalen, të cilën më pas edhe e fitoi.
Arsenal, gjithsesi, nuk duket më si skuadra e fillimit të sezonit. Ekipi i Arteta ka humbur terren në Premier League pas disa hapash fals dhe gjithashtu ka vuajtur edhe në Champions League, duke kaluar me vështirësi Sporting në çerekfinale dhe Leverkusen në 1/8-at.
Megjithatë, për londinezët ka edhe lajme pozitive, pasi pritet rikthimi i disa lojtarëve të dëmtuar, sidomos Saka. Në krahun tjetër, nuk duket shumë e mundshme që Merino të jetë në dispozicion për këto ndeshje.
