Gabriele Gravina nuk është më president i Federatës Italiane të Futbollit. Është bërë e ditur se 72-vjeçari ka dhënë dorëheqjen nga posti që mbante prej vitit 2018, duke i dhënë fund një periudhe të vështirë për futbollin italian.
Sipas raportimeve, humbja ndaj Bosnjës dhe dështimi i Italisë për të siguruar një vend në Botëror kanë qenë goditja vendimtare që çoi në këtë vendim drastik. Eliminimi i Azzurrëve ka shkaktuar tronditje të madhe në Itali dhe duket se pasojat kanë nisur menjëherë në nivelet më të larta të drejtimit.
Ndërkohë, sipas SkySports, Federata Italiane po shqyrton dy kandidatë për ta zëvendësuar Gravinan: Giovanni Malagò dhe Giancarlo Abete. Vendimi përfundimtar pritet të shpallet më 22 qershor, pas procesit zgjedhor.
Largimi i Gravinës mbyll një kapitull të mbushur me shumë zhgënjime për futbollin italian, ndërsa tani pritet të shihet se kush do të marrë drejtimin për të nisur një epokë të re.
