Zinedine Zidane e ka nisur me fitore aventurën e tij në krye të Francës. “Les Bleus” mposhtën Turqinë 1-0 në transfertë në ndeshjen e parë të Nations League, por triumfi u zbeh nga dëmtimi i Kylian Mbappé.
Franca vuajti në pjesën e parë përballë një Turqie të organizuar mirë, ndërsa Maignan u desh të ndërhynte në disa momente. Me kalimin e minutave, skuadra e Zidane mori kontrollin dhe krijoi rastet më të rrezikshme me Mbappé, Olise, Rabiot dhe Cherki, por 45 minutat e para u mbyllën pa gola.
Zhbllokimi erdhi në minutën e 54-t. Pas një topi të humbur nga Turqia, Olise shërbeu Mbappén dhe kapiteni francez realizoi me një goditje të fortë, duke shënuar golin e parë të epokës Zidane.
Por vetëm pak minuta më vonë erdhi shqetësimi i madh. Mbappé ndjeu dhimbje në gjurin e majtë, provoi të vazhdonte pas ndërhyrjes së stafit mjekësor, por u rrëzua sërish dhe kërkoi menjëherë zëvendësimin. Në minutën e 60-të ai u largua duke çaluar, me Désiré Doué që mori vendin e tij.
Në Madrid ka shqetësim për gjendjen e sulmuesit, veçanërisht pasi bëhet fjalë për të njëjtin gju që i kishte shkaktuar probleme edhe sezonin e kaluar. Ende nuk ka një diagnozë përfundimtare dhe Mbappé pritet t’u nënshtrohet ekzaminimeve për të përcaktuar shkallën e dëmtimit dhe nëse do të vazhdojë grumbullimin me Francën.
Turqia mbeti me dhjetë lojtarë në fund, pasi portieri Çakir u përjashtua me karton të kuq pas ndërhyrjes së VAR-it për prekje të topit me dorë jashtë zonës. Franca ruajti avantazhin dhe Zidane e mbylli debutimin me fitore, por tashmë të gjithë sytë janë te gjendja e Mbappé.
