Antonio Conte nuk e fsheh dëshirën për t’u rikthyer një ditë në stolin e Juventusit. Trajneri italian, në një intervistë për Cronache di Spogliatoio, foli hapur për marrëdhënien e tij me klubin bardhezi dhe zbuloi se në dy raste gjatë viteve të fundit kishte ekzistuar mundësia për një ribashkim.
“Herët a vonë do të duhet ta mbyllim atë rreth. Nuk e di nëse do të ndodhë pas një, dhjetë apo pesëmbëdhjetë vitesh, por e di se kam lënë diçka pezull me Juventusin”, deklaroi Conte.
Ai shpjegoi se për një rikthim duhet të përputhen dy kushte: ai të jetë i lirë dhe Juventusi të jetë në kërkim të një trajneri.
Conte përmendi dy raste konkrete kur kjo mund të kishte ndodhur.
“Ndodhi kur unë isha i lirë dhe Juventusi vendosi të merrte Sarrin. Më pas shkova tek Interi. Ndodhi përsëri kur isha i lirë dhe Giuntoli zgjodhi Thiago Mottën. Atëherë shkova te Napoli.”
Trajneri tregoi gjithashtu se mund të kishte marrë drejtimin e Juventusit që në vitin 2009, pas eksperiencës te Bari. Megjithatë, mosmarrëveshjet për mënyrën e përdorimit të Diego-s bënë që gjithçka të dështonte.
“Nëse një lojtar duhet të vendosë se si duhet të luajmë, atëherë unë nuk jam trajneri i duhur për ju”, kujtoi Conte se u kishte thënë drejtuesve të klubit.
Conte më pas foli edhe për tifozët e Juventusit, të cilët vazhdojnë ta pyesin për një rikthim në Torino.
“Do të rikthehem kur të krijohet mundësia dhe kur të përputhen disa situata. E di që nuk do të jetë e lehtë, por herët a vonë ai rreth duhet të mbyllet.”
Conte drejtoi Juventusin nga viti 2011 deri në 2014, duke nisur një periudhë të suksesshme për bardhezinjtë dhe duke fituar tre tituj radhazi në Serie A.











