Lidhja Demokratike e Kosovës (LDK) ka emëruar liderin e partisë, Lumir Abdixhiku, si kandidat për kryeministër në zgjedhjet e jashtzakonshme që do të mbahen më 28 dhjetor. Gjatë një konference për media, Abdixhiku deklaroi se diskutimi për kandidaturën ka qenë i shkurtër dhe që kryesia e LDK-së është e mendimit se, për të pasur kreun e partisë, nuk ka nevojë për kandidatë të tjerë për këtë post. Ai gjithashtu shprehu se ka marrë autorizimin për përpilimin e listës zgjedhore, megjithatë nuk do ta menaxhojë renditjen e kandidatëve.
Abdixhiku theksoi se partia do të garojë e vetme, por se lista zgjedhore do të mbetet e hapur për individë dhe parti të tjera, përfshirë mundësinë që Nisma Socialdemokrate e Fatmir Limajt të jetë pjesë e saj. Limaj, në zgjedhjet e kaluara, kishte garuar në një listë me Aleancën për Ardhmërinë e Kosovës. Abdixhiku ka bërë të ditur se LDK-ja është e gatshme të bisedojë për bashkëpunim me parti të tjera si Demokristianët, Partinë e Drejtësisë dhe Aleancën e Pacollit, duke ftuar individë që duan të garojnë në listën e LDK-së.
LDK doli e treta në zgjedhjet e kaluara të 9 shkurtit, duke siguruar 18.27% të votave, ku Abdixhiku ishte gjithashtu kandidat për kryeministër. Ai ka bërë thirrje për unitet ndërmjet partive, duke potencuar se ky është një “momentum i ri” që mund të vendosë LDK-në në një pozicion më të fortë se në të kaluarën. Ai e theksoi nevojën që të punojnë për një rezultat të ndryshëm nga ai i zgjedhjeve të 9 shkurtit, që çuan në bllokim politik.
Në ato zgjedhje, Lëvizja Vetëvendosje me liderin Albin Kurti kishte fituar 42.30% të votave, por nuk arriti të formojë dy herë një Qeveri, kjo hap rrugën për zgjedhje të reja. LDK-ja kishte refuzuar ofertën e Kurtit për bashkëpunim në qeverisje, duke thelluar më tej tensionet politike në vend.
