Shtetet e Bashkuara i kanë mohuar për të dytin vit radhazi presidentit palestinez Mahmoud Abbas vizën për të hyrë në vend dhe për të marrë pjesë në Asamblenë e Përgjithshme të Kombeve të Bashkuara në Nju Jork.
Vendimi i administratës amerikane vjen pak ditë para nisjes së sesionit të ri të Asamblesë së Përgjithshme. Departamenti amerikan i Shtetit njoftoi gjithashtu zgjatjen e kufizimeve të vizave për zyrtarë të Autoritetit Palestinez dhe anëtarë të Organizatës për Çlirimin e Palestinës.
Uashingtoni argumenton se Autoriteti Palestinez dhe PLO-ja nuk kanë përmbushur angazhimet e tyre dhe i akuzon për përpjekje për ta çuar konfliktin izraelito-palestinez në institucionet ndërkombëtare, përfshirë Gjykatën Ndërkombëtare të Drejtësisë dhe Gjykatën Penale Ndërkombëtare. SHBA përmend gjithashtu përpjekjet për njohjen e njëanshme të shtetit palestinez.
Autoriteti Palestinez e ka cilësuar vendimin si “të pajustifikuar”, duke thënë se ai dëmton marrëdhëniet palestinezo-amerikane dhe përpjekjet për një zgjidhje me dy shtete.
Ndërkohë, Asambleja e Përgjithshme votoi që Abbas të lejohet të drejtohet sërish përmes një video-mesazhi, siç ndodhi vitin e kaluar kur atij iu mohua gjithashtu viza.
