Tre të rinj shqiptarë kanë humbur jetën në një aksident të rëndë rrugor në Athinë, ndërsa dy të tjerë ndodhen në spital, njëri prej tyre në gjendje kritike për jetën.
Ngjarja ndodhi rreth orës 02:00 të mëngjesit të së enjtes, në bulevardin Poseidonos, në zonën e Glyfadës. Automjeti me pesë persona brenda ka dalë nga rruga dhe është përplasur me një mur betoni pranë një hoteli.
Goditja ka qenë e fuqishme dhe makina është dëmtuar rëndë. Për nxjerrjen e personave nga automjeti i aksidentuar u angazhuan forcat zjarrfikëse, me tetë efektivë dhe tre mjete, duke përdorur edhe pajisje speciale.
Tre prej personave që ndodheshin në makinë nuk kanë mundur t’u mbijetonin plagëve. Sipas të dhënave të bëra publike nga autoritetet greke, viktimat janë 23 dhe 26 vjeç, ndërsa për personin e tretë ende nuk janë publikuar të dhëna të plota për identitetin.
Dy të mbijetuarit janë 18-vjeçarë. Njëri është në gjendje kritike dhe ndodhet i intubuar, ndërsa tjetri ka marrë dëmtime të shumta dhe po trajtohet në spital.
Mediat greke raportojnë se policia rrugore ka nisur hetimet për të përcaktuar shkaqet e aksidentit. Në kuadër të hetimit po verifikohen edhe pamjet e kamerave të sigurisë në zonën ku ndodhi përplasja. Deri tani nuk raportohet se në aksident është përfshirë ndonjë automjet tjetër.
Ndërkohë, sipas FieriWeb, tre personat që humbën jetën janë nga Fieri. Lajmi ka tronditur familjet e tyre, ndërsa vëmendja vijon të jetë te gjendja shëndetësore e dy 18-vjeçarëve që mbijetuan dhe po marrin trajtim në spital.
