Policia e Tiranës ka zbardhur konfliktin e ndodhur mbrëmjen e së hënës në rrugën “Frosina Plaku”, ku disa persona u përfshinë në një sherr me sende të forta dhe mjet prerës për motive të dobëta.
Sipas policisë, pas veprimeve hetimore u arrestuan në flagrancë L. N., 46 vjeç, A. L., 44 vjeç dhe E. K., 23 vjeç, të dyshuar për veprën penale “Plagosja e rëndë me dashje”. Ndërkohë, shtetasi A. I., 33 vjeç, i cili mbeti i plagosur gjatë konfliktit dhe ndodhet në spital nën kujdesin e mjekëve, u procedua penalisht në gjendje të lirë.
Në lidhje me ngjarjen, policia shpalli në kërkim edhe 17-vjeçarin E. L., i dyshuar për “Plagosje të rëndë me dashje”, kryer në bashkëpunim, si dhe për “Prodhimin, mbajtjen, blerjen apo shitjen pa leje të armëve të ftohta”. Vijojnë kërkimet për kapjen e tij.
Materialet procedurale i janë referuar Prokurorisë për veprime të mëtejshme hetimore.
