Vinicius Junior pritet të mbërrijë këtë të diel në Madrid, ndërsa të hënën do të nisë stërvitjen nën urdhrat e José Mourinhos.
Sulmuesi brazilian do të zhvillojë fillimisht një takim me trajnerin dhe më pas me drejtuesit e klubit, për të sqaruar përfundimisht të ardhmen e tij. Kontrata aktuale përfundon pas 11 muajsh dhe, nëse nuk arrihet marrëveshja për rinovimin, largimi nuk përjashtohet më.
Real Madridi nuk ka ndërmend ta përmirësojë ndjeshëm ofertën e paraqitur, ndërsa kërkon të kuptojë nëse lojtari dëshiron realisht të qëndrojë. Vinicius kishte shprehur më parë dëshirën për të vazhduar në “Santiago Bernabéu”, por firma ende nuk ka ardhur.
Arsenali raportohet se po e ndjek situatën, megjithëse nga klubi madrilen dhe përfaqësuesit e lojtarit mohohen marrëveshjet konkrete.
Takimi i ardhshëm pritet të jetë vendimtar: ose rinovim, ose Real Madridi do të shqyrtojë mundësinë e shitjes së brazilianit.
