Vinicius ka dalë në mbështetje të Lamine Yamal në luftën kundër racizmit, duke theksuar se reagimi publik i talentit të Barcelona mund të ndihmojë edhe të tjerët që përballen me situata të ngjashme. Në konferencën për shtyp para ndeshjes me Bayern, sulmuesi i Real Madrid u shpreh se kjo është një betejë që duhet vazhduar së bashku.
Braziliani tha se raste të tilla ndodhin vazhdimisht dhe nënvizoi se është shumë e rëndësishme që Lamine Yamal të flasë hapur, sepse kjo mund të ketë ndikim pozitiv te të tjerët. Vinicius shtoi se ai dhe lojtarë të tjerë të njohur kanë më shumë mundësi për t’u mbrojtur, por njerëzit më të pambrojtur e kanë edhe më të vështirë, ndaj uniteti është thelbësor në këtë luftë.
Deklarata e tij vjen pasi Lamine Yamal dënoi koret islamofobe dhe ksenofobe të dëgjuara gjatë ndeshjes miqësore mes Spanjës dhe Egjiptit në stadiumin RCDE. Pas ndeshjes, Yamal i quajti këto thirrje fyese, të papranueshme dhe raciste, ndërsa policia në Katalonjë hapi një hetim për incidentin.
Vinicius theksoi gjithashtu se nuk po thotë se vende si Spanja, Gjermania apo Portugalia janë vende raciste, por se racizmi ekziston kudo dhe se vetëm një reagim i përbashkët mund ta zvogëlojë këtë fenomen në të ardhmen. Mesazhi i tij ishte i qartë: futbolli duhet të qëndrojë i bashkuar që brezat e rinj të mos detyrohen të kalojnë të njëjtat përvoja.
Vetë Vinicius e njeh nga afër këtë problem, pasi ka qenë disa herë objekt i abuzimeve raciste. Së fundmi, ai akuzoi Gianluca Prestianni për ofendim racist në ndeshjen Benfica-Real Madrid në Champions League, incident që çoi në ndërprerjen e përkohshme të lojës dhe më pas edhe në një pezullim të përkohshëm nga UEFA për lojtarin argjentinas, ndërsa hetimet vazhduan.
