Kina ka njoftuar se do të rrisë tarifat shtesë për mallrat amerikane në 125 për qind, një rritje të ndjeshme nga 84 përqind që ishin më parë.
Ka qenë vetë Ministria kineze e Financave e cila përmes një njoftimi zyrtar bën me dije se tarifat e reja do të hyjnë në fuqi nga e shtuna. Gjithashtu, shtoi se nëse SHBA këmbëngul të vazhdojë të shkelë interesat e Kinës , atëherë Pekini do të marrë kundërmasa dhe “të luftojë deri në fund”.
“Vendosja e tarifave jashtëzakonisht të larta të SHBA-së ndaj Kinës shkel seriozisht rregullat e tregtisë ndërkombëtare, ligjet bazë të ekonomisë tonë”, shtoi ministria kineze.
Ndër të tjera Ministria e Financave tha se ky ndryshim i bërë sa i përket tarifave mund të jetë i fundit nga ana e tyre.
“Edhe nëse SHBA do të vazhdojë të vendosë tarifa më të larta, nuk do të ketë më kuptim ekonomik dhe do të bëhet shaka në historinë e ekonomisë globale”, thuhet në deklaratë.
